• Parathënie
• Një vështrim i shkurtër historik rrugës së revizionistëve titistë
• Sistemi i «vetadministrimit» në ekonomi
• «Vetadministrimi» dhe pikëpamjet anarkiste mbi shtetin. Çështja nacionale në Jugosllavi
• Sistemi i «vetadministrimit» dhe mohimi i rolit udhëheqës të partisë
• Pluralizmi politiko-ideologjik, «demokracia» dhe ndërtimi «socialist» në Jugosllavi

Proletarë të të gjitha vendeve, bashkohuni!

«VETADMINISTRIMI» JUGOSLLAV TEORI DHE PRAKTIKë KAPITALISTE

(Kundër pikëpamjeve antisocialiste të E. Kardelit, të shprehura në librin: «Drejtimet e zhvillimit të sistemit politik të vetadministrimit socialist»)

ENVER HOXHA

Parathënie

Idetë antimarksiste të këtij libri u vunë në themel të të gjitha punimeve të Kongresit të 11-të të partisë revizioniste jugosllave, së cilës titistët, për t'i maskuar karakterin borgjez, i kanë vënë emrin «Lidhja e Komunistëve të Jugosllavisë».

Sistemin e «vetadministrimit» titistët dhe kapitalizmi ndërkombëtar, siç vuri në dukje Kongresi i 7-të i PPSH, e propagandojnë si «njërrugë të gatshme të sprovuar të socializmit» dhe e përdorin si një armë të preferuar në luftën kundër socializmit, revolucionit dhe luftërave çlirimtare.

Duke pasur parasysh këtë rrezikshmëri, e ndiej të nevojshme të shpreh disa mendime rreth këtij libri.

Në Jugosllavi, siç dihet, është vendosur plotësisht kapitalizmi, veçse ky kapitalizëm maskohet me marifet. Jugosllavia hiqet sikur është një shtet socialist, por i një lloji të veçantë, që nuke paska parë bota gjer më sot! Titistët, bile, mburren që shteti i tyre nuk ka asgjë të ngjashme me shtetin e parë socialist që doli nga Revolucioni Socialist i Tetorit dhe që e themeluan Lenini e Stalini në bazë të teorisë shkencore të Marksit e të Engelsit.

Renegatët jugosllavë qysh në fillim janë shmangur nga teoria shkencore e marksizëm-leninizmit mbi shtetin socialist dhe kanë punuar që të mos vendosej diktatura e proletariatit, që Jugosllavia të ecte në rrugën e kapitalizmit.

E kam shprehur edhe herë tjetër se, si përpara, edhe pas çlirimit të Jugosllavisë, grupi renegat titist, që ishte i maskuar, që hiqej si përkrahës i sistemit socialist të vendosur në Bashkimin Sovjetik, që trumbetonte se do të ndërtonte socializmin në bazë të teorisë shkencore të marksizëm-leninizmit, në të vërtetë ka qenë kundër kësaj ideologjie dhe kundër përvojës revolucionare sovjetike. Ky konkluzion i drejtë del qartë edhe nga përmbajtja e librit të Kardelit.